Para pak minutash në qytetin bregdetar të Durrësit, pranë një hoteli në pronësi të ish-kryebashkiakut Vangjush Dako është zbuluar një sasi lënde shpërthyese, e dyshuar si tritol.
Hoteli ndodhet në lagjen nr.1, pranë gjimnazit “Gjergj Kastrioti”, dhe lënda shpërthyese u gjet në afërsi të godinës, e lidhur me një aparat celular, çka tregon se ishte gati për t’u aktivizuar në distancë.
Pas njoftimit të menjëhershëm nga stafi i hotelit, në vendngjarje kanë mbërritur forcat e policisë, forcat xheniere dhe grupi hetimor. Ekspertët e anti-eksplozivit kanë bërë shpërthimin e kontrolluar të lëndës, duke shmangur një ngjarje me pasoja të rënda.
Burime mediatike bëjnë me dije se aktualisht nuk ka persona të dyshuar, ndërsa po mblidhen pamjet e kamerave të sigurisë në zonë për të identifikuar autorin apo autorët e mundshëm. Policia nuk ka konfirmuar ende nëse ngjarja lidhet me çështje personale, hakmarrje apo presion kriminal.
Kujtojmë se Vangjush Dako, ish-kreu i Bashkisë së Durrësit, ka qenë më parë nën hetim për afera të ndryshme gjatë kohës që drejtonte bashkinë. Megjithatë, aktualisht nuk ka të dhëna nëse ngjarja ka ndonjë lidhje direkte me aktivitetin e tij të mëparshëm politik apo bizneset e tij private.
Hetimet vijojnë.
