Tre raste të tregtimit të kundërligjshëm të lëndëve piroteknike janë evidentuar në Tiranë, ku si rezultat dy persona janë arrestuar dhe një tjetër po hetohet në gjendje të lirë.
Sipas të dhënave zyrtare, në pranga ka rënë H. Z., 22 vjeç, teksa gjatë kontrollit në automjetin dhe banesën e tij u gjet një sasi e konsiderueshme lëndësh piroteknike, si edhe veshje të dyshuara të kontrabanduara. Materialet janë sekuestruar si prova.
Po ashtu, është arrestuar edhe D. Q., 22 vjeç, pasi nga kontrollet në automjet dhe banesë iu gjetën lëndë të ndryshme piroteknike.
Ndërkohë, ndaj R. H., 45 vjeç, pronar i një marketi në rrugën “Frosina Plaku”, ka nisur procedim penal, pasi gjatë kontrollit në ambientet e biznesit iu gjet dhe sekuestrua një sasi lënde e dyshuar plasëse.
Materialet procedurale i janë referuar Prokurorisë për veprime të mëtejshme ligjore.
