Lufta me zjarrin tek kompleksi pallateve tek Farmacia 10, vijon prej 3 orësh dhe vatra ende nuk është fikur. Makina të shumta zjarrfikëse, forca policie janë në vendin e ngjarjes. 2 helikopterë Cougar në misione nga ajri, 8 zjarrfikëse, ku 6 nga emergjencat dhe 50 persona nga ushtria dhe emergjencat civile janë të përfshirë në këtë operacion.
Zjarri ka nisur nga një market në katin e parë dhe më pas ka përpirë të gjithë pallatin duke shkaktuar dëme të shumta.
Në vendin e ngjarjes ishte dhe drejtori i përgjithshëm i Policisë së Shtetit, Skënder Hita. Në fjalën e tij, Hita tha se do të kryhen të gjitha hetimet për të kuptuar shkaqet e zjarrit dhe u shpreh se do të ketë masa ekstreme.
“Akoma nuk janë kontrolluar të gjitha apartamentet. Po grumbullojmë gjithë provat e nevojshme. Do marrim gjithë kamerat e sigurisë dhe do kryejmë gjithë procedurat hetimore. Dhe nëse zjarri ka ardhur nga persona të jashtëm, patjetër që do ketë edhe masa ekstreme”, tha kryepolici Skënder Hita.
Drejtori i zjarrfikëses së Tiranës, Shkëlqim Goxhaj tha se zjarri është lokalizuar ndërkohë që forcat zjarrfikëse janë në gatishmëri. Sipas tij, shkak për përhapjen e shpejtë të zjarrit ishte fasada e pallatit.
“Fasada ndihmoi përhapjen e flakëve në të gjithë objektin. Jemi duke punuar në të dyja faqet e objektit me autoshkalla ndërkohë që brenda objektit ndodhet një grup që po punon për shuarjen e vatrës së zjarrit. Paralelisht jemi angazhuar me të gjithë forcat e mjetet për të izoluar vatrën e zjarrit. Për momentin kemi izoluar vatrën e zjarrit brenda një seksioni dhe nuk ka rrezik prekja e seksioneve të tjera”.
11 persona kanë mbetur të dëmtuar në total. Midis tyre ka qytetarë por dhe forca zjarrfikëse. 1 ka pësuar djegie dhe është dërguar tek djegiet plastike në QSUT, 1 në urgjencë dhe 5 te toksologjia.
