Në GJKKO u mbajt këtë të hënë seanca e radhës për masën e sigurisë ndaj ish-presidentit Ilir Meta. Ndryshe nga seanca e parë, këtë herë në ambientet e GJKKO-së ishin të pranishëm edhe deputetë të opozitës në mbështetje të kreut të PL-së.
Në seancë morën pjesë deputetët Flamur Noka, Klevis Balliu, Bujar Leskaj, Edmond Haxhinasto dhe Tedi Blushi.
Vetë Meta nuk ishte i pranishëm në sallë, pasi kishte dërguar një deklaratë ku shprehej se nuk do të marrë pjesë në seancën për masën e sigurisë, por do të jetë prezent vetëm në gjyqin në themel.
Ish-presidenti u përfaqësua nga avokati i tij, Kujtim Cakrani, i cili kërkoi sërish ndryshimin e masës “arrest me burg”. Sipas tij, ndaj Metës mund të aplikoheshin masa më të lehta si “detyrim paraqitje”, “ndalim i daljes jashtë shtetit”, garanci pasurore apo edhe “arrest shtëpie”.
Megjithatë, GJKKO rrëzoi sërish kërkesën e Metës për lirimin nga qelia. Mësohet se ai kishte ofruar edhe një garanci pasurore prej 50 mijë eurosh për ndryshimin e masës së sigurisë, por kërkesa u refuzua nga gjykata.
Ndërkohë, në GJKKO po zhvillohet edhe seanca në themel për dosjen në ngarkim të Metës dhe të pandehurve të tjerë. Avokati Kujtim Cakrani u shpreh para mediave se shpresonte në një vendim pozitiv për klientin e tij.
