Një operacion i Policisë së Kosovës ka çuar në sekuestrimin e 21 kilogramëve drogë, ndërsa autori arriti t’i shpëtojë arrestimit duke u larguar drejt territorit shqiptar.
Ngjarja ndodhi mbrëmjen e djeshme, rreth orës 20:30, në vijën e gjelbër kufitare mes Kosovës dhe Shqipërisë, në zonën e Vermicës. Sipas burimeve, një person i dyshuar si trafikant droge, i cili mbante një çantë shpine, u ndesh me efektivët e njësisë antidrogë që ndodheshin në operacion dhe në veshje civile.
Në momentin që policët iu prezantuan, i dyshuari i drejtoi armën duke rrezikuar jetën e tyre. Më pas ai braktisi çantën dhe u arratis me shpejtësi drejt territorit shqiptar.
Gjatë kontrollit të çantës së lënë në vendngjarje, u gjet një sasi e konsiderueshme lënde narkotike. Matjet e njësisë antidrogë konfirmuan se bëhej fjalë për rreth 21 kilogramë marihuanë.
Policia e Kosovës ka nisur hetimet dhe po bashkëpunon me autoritetet shqiptare për kapjen e autorit.
