Policia e Tiranës ka vënë në pranga 43-vjeçaren Alma Bime, drejtoreshë e Emigracionit në Ministrinë e Brendshme.
Sipas policisë, Bime dyshohet se ka thyer masën e sigurisë “Arrest në shtëpi”, si edhe ka tentuar t’i vërë flakën automjetit të ish-bashkëjetuesit të saj.
“Specialistët për Hetimin e Krimeve të Komisariatit të Policisë Nr. 4., arrestuan shtetasen A. B., 43 vjeçe, pasi dyshohet se ka thyer masën e sigurisë ‘Arrest në shtëpi’ si dhe ka tentuar t’i djegë automjetin ish-bashkëjetuesit;”, njofton policia.
Kujtojmë se drejtoresha e Ministrisë së Brendshme ishte shoqëruar edhe në muajin dhjetor, nën dyshimet për kanosjen e një shtetasi të huaj përmes mesazheve, si dhe për djegien e orendive shtëpiake të ish-bashkëjetuesit të saj, Mareglen Tomori.
Sipas burimeve, Tomori disponon një vilë trekatëshe në rrugën “Hysen Xhura”, në zonën e Kinostudios, ku prej disa kohësh kishte punësuar një shtetas të huaj me leje qëndrimi në Shqipëri, i cili jetonte në katin e parë të banesës dhe kujdesej për kopshtin.
Bime dyshohet se është konfliktuar fillimisht me ish-bashkëjetuesin e saj, duke i djegur një krevat në vilë, ndërsa më pas është përfshirë në konflikt edhe me shtetasin e huaj, të cilin e ka akuzuar për bashkëpunim me Tomorin dhe e ka kërcënuar se do t’i hiqte lejen e qëndrimit.
Denoncimi në polici është bërë nga Mareglen Tomori, i cili ka paraqitur si dëshmitarë edhe punëtorin e huaj, me qëllim vërtetimin e mesazheve kërcënuese që, sipas tij, i janë dërguar nga Alma Bime.
