Një ngjarje e rëndë kriminale ka tronditur qytetin e Durrësit mbrëmjen e 24 shtatorit, ku një person ka tentuar të vrasë një 55-vjeçar duke e përplasur qëllimisht me makinë dhe më pas është larguar nga vendi i ngjarjes. Sipas të dhënave zyrtare, rreth orës 19:54, në rrugën “Vala e Detit”, një automjet tip “Mercedes-Benz” ka goditur rëndë shtetasin A. K. alias B. K., 55 vjeç, banues në Durrës. Pas përplasjes, drejtuesi i mjetit është larguar me shpejtësi, duke braktisur viktimën në vendngjarje.
Forcat e Policisë Rrugore dhe strukturat e Krimeve të Rënda të Drejtorisë Vendore të Policisë Durrës kanë ndërhyrë menjëherë, duke nisur hetimet për zbardhjen e plotë të ngjarjes. Pas veprimeve intensive hetimore, është bërë i mundur identifikimi i drejtuesit të mjetit si A. B., 40 vjeç, lindur dhe banues në Shijak.
Nga të dhënat e grumbulluara deri më tani, dyshohet se përplasja nuk ka qenë aksidentale, por një tentativë për vrasje me paramendim, e kryer përmes automjetit. Për këtë arsye, 40-vjeçari është shpallur në kërkim policor dhe ndaj tij rëndon akuza për veprën penale “Vrasja me paramendim”, mbetur në tentativë.
Policia e Durrësit ka nisur kërkimet për lokalizimin dhe arrestimin e autorit, si dhe për gjetjen dhe sekuestrimin e automjetit të përdorur në krim. Ndërkohë, i plagosuri 55-vjeçar është dërguar fillimisht në spitalin rajonal të Durrësit dhe më pas është transportuar në Spitalin e Traumës në Tiranë, ku ndodhet nën kujdesin e mjekëve dhe raportohet se është në gjendje të rëndë shëndetësore.
