Me kërkesë të Prokurorisë pranë Gjykatës së Shkallës së Parë të Juridiksionit të Përgjithshëm Fier, janë shpallur fajtorë dhe janë dënuar me 25 vite burgim shtetasit L.H. dhe M.M., për veprën penale “Vrasja në rrethana cilësuese” në mënyrë të rrezikshme për jetën e shumë personave, e kryer në bashkëpunim, mbetur në tentativë.
Në përfundim të hetimit dhe gjykimit mbi procedimin penal nr. 150/2023, Prokuroria arriti të provojë se i pandehuri L.H., me qëllim hakmarrjen për vrasjen e vëllait të tij, R.H., ka bashkëpunuar me të pandehurin M.M., të cilit i ka porositur eleminimin fizik të shtetasit M.H.
Sipas hetimeve, më 30 mars 2023, rreth orës 16:00, në vendin e quajtur “Pisha”, fshati Garunjë, Lushnjë, i pandehuri M.M., pasi është informuar mbi targën e automjetit të shtetasit R.H., ka siguruar armën e zjarrit dhe ka qëlluar njëmbëdhjetë herë drejt mjetit. Nga sulmi, B.S., pasagjere në vendin e parë të makinës, ka mbetur e plagosur, ndërsa shtetasi M.H., shënjestra e sulmit, ka arritur të shpëtojë duke shtuar shpejtësinë e automjetit.
Prokuroria pranë Gjykatës së Shkallës së Parë të Juridiksionit të Përgjithshëm Fier thekson angazhimin e saj të plotë për vënien para përgjegjësisë ligjore të personave që kryejnë vepra penale kundër jetës dhe shëndetit.
