Dhjetëra banorë të Dragostunjës janë përplasur verbalisht me efektivët e policisë për shkak të bllokimit të rrugës pranë zonës së njohur si Arrat e Gurrës. Banorët shprehen se bllokimi i rrugës po i izolon dhe po u krijon vështirësi serioze në përditshmëri, duke penguar qarkullimin drejt zonave të tjera.
Një pjesë e tyre kërkojnë ndërhyrje të menjëhershme për krijimin e një kalimi alternativ, ndërsa të tjerë kërkojnë të paktën lejimin e kalimit në këmbë për raste emergjente.
Aksi është mbyllur nga autoritetet për shkak të rrezikut të lartë nga rrëshqitjet e tokës dhe dëmtimet e konsiderueshme në infrastrukturë. Në zonë është vendosur një perimetër sigurie, me qëllim parandalimin e incidenteve të mundshme, ndërsa lëvizjet e tokës raportohen si aktive.
Nga ana tjetër, burime policore bëjnë të ditur se masat e marra synojnë ekskluzivisht garantimin e sigurisë së qytetarëve, duke qenë se zona konsiderohet me rrezik të lartë.
