Ky është personi që sot rrezikoi seriozisht jetën e banorëve në një nga zonat më të populluara të Tiranës. Pranë ish-Librit Universitar, rreth orës 13:30, ky zotëri me një makinë pompoze me targat AA777MM përplasi një motor, duke lënduar një kamarier që punonte në një nga lokalet aty pranë. Për fat, në atë orë nuk kishte fëmijë që kthehen nga shkolla në trotuar, sepse pas përplasjes makina e tij përfundoi mbi trotuar duke plagosur edhe shitësen e një dyqani që ndodhet aty.
Ky njeri është një vrasës gjakftohtë që endet rrugëve të Tiranës. Si ky ka dhe dhjetëra të tjerë që vrasin nga pak çdo ditë. Diku përplasin, diku shkaktojnë dëme, por gjithmonë ia hedhin pa u lagur. Sepse në kuletën që kanë në dorë ndodhen shumë para, me të cilat mund të blesh makinë luksoze, por edhe policinë apo prokurorinë.
Sepse kaq vlerë ka jeta e shqiptarit sot: një tufë parash që blejnë heshtjen dhe drejtësinë. Ndaj jo më kot njerëz të tillë bredhin të lirë me makina që askush nuk i pyet si i kanë blerë, ndërsa na vrasin nga pak çdo ditë, pa u hyrë gjemb në këmbë.
