Prokuroria e Posaçme kundër Korrupsionit dhe Krimit të Organizuar ka njoftuar se ka paraqitur ankim në Gjykatën e Posaçme të Apelit në lidhje me procedimin pasuror që lidhet me sekuestrimin e pasurive të shtetasit Nikolla Hafësllari dhe personit të lidhur me të, Erjol Mekshi.
Sipas SPAK, shtetasi Hafësllari akuzohet për veprën penale “Ushtrim i ndikimit të paligjshëm ndaj personave që ushtrojnë funksione publike”, kryer në bashkëpunim, parashikuar nga nenet 245/1 dhe 25 të Kodit Penal.
Ankimi i Prokurorisë së Posaçme është bërë kundër vendimit nr. 18, datë 24.10.2025 të Gjykatës së Posaçme të Shkallës së Parë. Pas shqyrtimit të çështjes, Gjykata e Posaçme e Apelit, me vendimin nr. 262 datë 2.12.2025, vendosi ndryshimin e vendimit të mëparshëm dhe pranimin e kërkesës së SPAK për sekuestrimin e pasurive të personave në hetim.
Pasuritë e sekuestruara përfshijnë:
Garazh nr. 6, kati -1, rruga “Pjetër Bogdani”, Mëzez, Tiranë
Garazh nr. 7, kati -1, po në të njëjtën adresë
Automjet i markës “Audi”, modeli A6, viti i prodhimit 2005
Apartament nr. 19/1, shkalla 2, kati III, me sipërfaqe 87.89 m², rruga “Pjetër Bogdani”, Mëzez, Tiranë
Apartament nr. 21, shkalla 2, kati III, me sipërfaqe 61.89 m², po në të njëjtën adresë
Për ekzekutimin e vendimit janë ngarkuar oficerët e Policisë Gjyqësore dhe përfaqësuesit e Agjencisë për Administrimin e Pasurive të Sekuestruara dhe të Konfiskuara (AAPSK). Administrimi dhe përdorimi i pasurive të sekuestruara do të kryhet nga administratorët e kësaj agjencie.
