SPAK bën me dije se katër punonjës të Inspektoratit të Mbrojtjes së Territorit (IMT) kanë konstatuar një tendë pa leje në një objekt në zonën e Kombinatit. Sipas burimeve, pas verifikimeve dhe theksimit se objekti ishte ndërtuar pa leje dhe do të shembej, një prej inspektorëve është rikthyer më vonë dhe i ka kërkuar pronarit të objektit një shumë prej 1 mijë eurosh, me qëllim që të mos prishnin tendën.
Pronari i objektit ka njoftuar menjëherë policinë. Me urdhër të prokurorit, është organizuar një operacion për kapjen në flagrancë të zyrtarëve të dyshuar, duke i dhënë paratë me numra serialë të regjistruar.
Pas marrjes së parave, dy punonjës të IMT-së, Geraldo Fuçia dhe Klajdi Zhilla (i shpallur në kërkim), janë larguar drejt një lokali, ku kanë tentuar t’i fshehin paratë duke ia lënë ato banakierit. Fillimisht, policia ka kontrolluar ambientet e brendshme të lokalit, në pronësi të ish deputetit Mark Frroku, ku ka gjetur një telefon dhe një shumë tjetër parash, por jo ato me numrat serialë.
Pas këqyrjes së kamerave të sigurisë, është zbuluar vendi ku ishin fshehur paratë e ryshfetit, të cilat janë sekuestruar. Në përfundim të operacionit, Geraldo Fuçia është arrestuar në flagrancë, ndërsa Klajdi Zhilla është në kërkim.
Dy punonjësit e tjerë të IMT-së janë liruar, Edmond Çela dhe Niko Zmalaj pasi nuk rezultojnë të kenë qenë të përfshirë në veprën korruptive, të paktën në këtë rast. Megjithatë, hetimet vijojnë.
