Ndërsa të gjithë kishin sytë tek Gjykata Kushtetuese në pritje të vendimit të Kolegjit për kërkesën e kryeministrit Edi Rama lidhur me çështjen e pezullimit nga detyra të Belinda Ballukut, në SPAK dhe GJKKO pati zhvillime të rëndësishme. Dy vartësit e Belinda Ballukut, Erald Elezi, administrator i KESH dhe Gentian Gjyli, kreu i Autoritetit Rrugor Shqiptar, njëri pas tjetrit mbërritën në Prokurorinë e Posaçme. I pari, Elezi, u pyet nga hetuesit e BKH-së në cilësinë e të pandehurit, ndërsa i dyti, Gjyli, dha po ashtu shpjegime. Njëherazi zv.kryeministrja dhe Ministrja e Infrastrukturës Belinda Balluku, e pandehur për shkelje në tenderin për tunelin e Llogarasë dhe nën hetim për një tender të dytë, një nga lotet e Unazës së Madhe, ankimoi vendimin e GJKKO-së që ka caktuar ndaj saj masat e pezullimit nga detyra dhe ndalim për të dalë jashtë vendit. Ndërsa Apeli i Posaçëm pritet të caktojë datë për shqyrtimin e ankimimit, Kushtetuesja nga ana tjetër pritet që brenda ditës së sotme të caktojë po ashtu datën për mbledhjen e gjyqtarëve, ku 8 gjyqtarët kushtetues do të vendosin për fatin e kërkesës së Edi Ramës, që këtë herë u investua personalisht për fatin e krahut të tij të djathtë dhe të besuarës së tij, Belinda Balluku.
