Prokuroria për Krime të Rënda po vijon hetimet mbi zhdukjen e shisheve të shtrenjta të verës që u gjetën në një qilar të një resorti në pronësi të Ergys Agasit. Burime pranë SPAK bëjnë me dije se dosja është dorëzuar për kompetencë nga prokurori Bledar Valikaj, i cili ka lidhur produktin e verës me veprimtarinë kriminale të Agasit.
Vera ishte sekuestruar gjatë kontrolleve në pronat e tij, pasi Agasi dhe Ermal Beqiri janë shpallur në kërkim ndërkombëtar si pjesëtarë të një grupi që, sipas hetimeve, detyronte biznesmenët të tërhiqeshin nga tenderat e Agjencisë Kombëtare të Shoqërisë së Informacionit (AKSHI).
Pas sekuestrimit, malli i verës iu la në ruajtje kushëririt të Agasit, por kur autoritetet doganore shkuan për ta marrë për magazinim, konstatuan se shishet kishin zhdukur. Aktualisht, kushëriri i Agasit po hetohet për pengim të hetimeve, pasi nuk ka sqaruar destinacionin e verës.
Sipas ekspertimit, vlera e verës arrin në rreth 1.4 milionë euro, por mund të dyfishohej në rast se do të shitej në treg me shishe.
Ndërkohë, SPAK po vijon hetimet mbi dyshimet se Agasi dhe Beqiri kanë urdhëruar rrëmbimin e biznesmenit Gerond Meçe, duke e detyruar të tërhiqte ankesat për tenderat e AKSHI-t.
Për momentin, nën masën e arrestit në shtëpi ndodhen ish-drejtoresha e AKSHI-t, Mirlinda Karçanaj, dhe ish-zv.drejtoresha Hava Delibashi, ndërsa ndaj disa biznesmenëve dhe një zyrtari policie janë vendosur masa më të lehta.
