SPAK vijon procesin e forcimit të kapaciteteve hetimore, ndërsa është ende në pritje të emërimit të drejtuesit të ri të Byrosë Kombëtare të Hetimit. Në këtë kuadër, janë intensifikuar konkurset për përzgjedhjen e stafit ndihmës dhe hetuesve financiarë, ndërsa këtë të enjte pritet të zhvillohet faza e radhës së testimeve për kandidatët.
Paralelisht me këtë proces, SPAK ka hapur një thirrje të re për rekrutimin e 10 oficerëve të Policisë Gjyqësore, të cilët do të angazhohen në hetimin e çështjeve që lidhen me korrupsionin dhe krimin e organizuar. Sipas kritereve të përcaktuara, rekrutimet synojnë oficerë nga disa institucione specifike: një kandidat nga Antiterrori, dy nga Drejtoria e Përgjithshme e Tatimeve, dy nga Doganat, një nga Agjencia e Mbikëqyrjes Policore dhe një tjetër nga Policia Kufitare. Gjithashtu, të drejtë aplikimi kanë edhe oficerët e krimit ekonomik dhe ata të strukturave kundër krimit të organizuar.
Oficerët që do të përzgjidhen do të ushtrojnë funksionin e ndërlidhës mes SPAK-ut, BKH-së dhe institucioneve nga vijnë, duke garantuar shkëmbim të shpejtë dhe të sigurt të informacionit dhe qasje të plotë në të dhëna. Roli i tyre konsiderohet thelbësor për efikasitetin e hetimeve dhe bashkëpunimin ndërinstitucional.
Çdo oficer do të ketë një mandat pesëvjeçar dhe, pavarësisht institucionit të origjinës, do të veprojë në mënyrë të pavarur në përmbushjen e detyrave brenda strukturave të SPAK dhe BKH. Kjo pavarësi ka për qëllim të ruajë integritetin dhe paanshmërinë në hetimet që lidhen me zyrtarët e korruptuar dhe rrjetet e krimit të organizuar.
