SPAK bën publike rezultatet e operacionit të përbashkët me autoritetet gjermane. Prokurori Eneid Nakuçi: “Zbulohet call center mashtrues, 8 masa sigurie”
Prokuroria e Posaçme Kundër Korrupsionit dhe Krimit të Organizuar (SPAK) ka bërë publike sot rezultatet e një operacioni të zhvilluar në bashkëpunim me autoritetet gjermane, të koduar “Pandora”, i cili çoi në zbardhjen e një skeme mashtrimi në dëm të shtetasve të huaj, kryesisht nga Gjermania. Në një deklaratë për mediat, Prokurori i Posaçëm Eneid Nakuçi bëri me dije se gjatë hetimeve është dokumentuar veprimtaria e një grupi personash që vepronin përmes një call center-i të vendosur në territorin shqiptar. Sipas tij, shtetasit e përfshirë përdornin identitete të rreme, duke u prezantuar si oficerë të policisë gjermane, me qëllim mashtrimin e qytetarëve të cilëve më parë u ishin premtuar hetime dhe rimbursim për humbje në tregje të investimeve si Forex dhe kriptovaluta.
Operacioni “Pandora” u zhvillua në vijim të një hetimi të nisur në fund të vitit 2023 në Gjermani, i cili u pasua më pas nga hetime të thelluara në Shqipëri në fillim të vitit 2024. Gjatë operacionit në territorin shqiptar, janë ushtruar kontrolle në ambiente të identifikuara si call center, ku janë sekuestruar prova materiale, dokumentare dhe digjitale.
Bazuar në provat e mbledhura, SPAK i është drejtuar Gjykatës së Posaçme me kërkesë për caktimin e masave të sigurimit personal për 8 persona, ku:
5 janë vendosur në masën “arrest në burg”,
3 në masën “arrest në shtëpi”.
Në konferencën për shtyp, përfaqësuesi i prokurorisë gjermane deklaroi se “nga hetimi që kemi kryer janë shpëtuar rreth 6 mijë raste dhe u janë kursyer qytetarëve gati 1 milion euro që do ishin përfituar në mënyrë mashtruese nga grupi kriminal.”
Hetimet vazhdojnë në bashkëpunim me autoritetet gjermane për të identifikuar persona të tjerë të përfshirë dhe rrjetin e plotë të këtij aktiviteti të paligjshëm ndërkombëtar.
