SPAK ka përfunduar hetimet dhe ka dërguar për gjykim dy detyrë inspektorët e Inspektoratit Shtetëror Teknik Industrial Olsi Jarazi dhe Luan Sadikaj, si edhe administratorin e një biznesi privat, të cilët akuzohen për korrupsion.
Në kërkesën për gjykim, të pandehur janë:
Julian Suljoti, administrator i subjektit privat “Ansoil sh.a” në Korçë, akuzuar për korrupsion aktiv të personave që ushtrojnë funksione publike;
Olsi Jarazi, inspektor aktual i ISHTI-t, dhe
Luan Sadikaj, ish-inspektor i ISHTI-t, të akuzuar për korrupsion pasiv, kryer në bashkëpunim.
Hetimet, të kryera nga Byroja Kombëtare e Hetimit (BKH) me metoda speciale, zbuluan se më 1 nëntor 2021, Jarazi dhe Sadikaj morën 900,000 lekë dhe 10,000 dollarë nga Suljoti. Shuma u jep për të mos ndëshkuar subjektin privat, i cili operonte pa dokumentacionin teknik dhe licensën e nevojshme.
Procedimi penal ishte regjistruar fillimisht nga Prokuroria e Korçës dhe më pas i kaloi SPAK-ut, i cili ka përfunduar hetimet dhe ka dorëzuar çështjen për gjykim në Gjykatën e Posaçme të Shkallës së Parë.
