Prokuroria e Posaçme kundër Korrupsionit dhe Krimit të Organizuar (SPAK) ka përfunduar hetimet paraprake për procedimin penal nr. 59/2 të vitit 2022 dhe ka paraqitur në Gjykatën e Posaçme të Shkallës së Parë për Korrupsionin dhe Krimin e Organizuar kërkesën për dërgimin në gjyq të 6 të pandehurve, të akuzuar për vepra të rënda penale, të kryera në kuadër të një grupi të strukturuar kriminal.
Të pandehurit ndaj të cilëve është kërkuar gjykimi janë:
Albert Zaja, i akuzuar për tentativë vrasjeje ndaj shtetasve Durim Bami dhe Ervin Kodra, sigurim kushtesh për vrasje ndaj shtetasit Hamza Terziu, armëmbajtje pa leje dhe pjesëmarrje në grup të strukturuar kriminal.
Edison Muceku, i arrestuar në Mbretërinë e Bashkuar dhe ekstraduar në Shqipëri në mars 2025, akuzohet për sigurimin e mjeteve për vrasje, pjesëmarrje në grup të strukturuar kriminal dhe kryerje veprash penale nga organizatë kriminale.
Elvis Ndreca, akuzohet për sigurimin e kushteve për vrasje të Durim Bamit dhe përfshirje në grup kriminal.
Armando Ndreca, akuzohet për organizim dhe financim të prodhimit dhe shitjes së 243 kg kanabis, si dhe pjesëmarrje në grup kriminal.
Deivis Bajramaj, i akuzuar për tregti të paligjshme armësh dhe drejtim të një organizate kriminale.
Adrian Pikli, i arrestuar në Gjermani dhe ekstraduar në Shqipëri në korrik 2024, akuzohet për tregti armësh dhe përfshirje në grup të strukturuar kriminal.
Ngjarjet e hetuara përfshijnë tentativa vrasjeje, organizim atentatesh, prodhim e trafikim të lëndëve narkotike dhe armëve, me veprimtari të shtrirë në disa qytete të vendit në periudhën 2020–2021.
Po ashtu, Prokuroria ka paraqitur kërkesë për pushimin e çështjes në ngarkim të dy të pandehurve: Silvio (Roland) Cara dhe Elmir Tufa, për të cilët nuk u provua përfshirja në vrasjen e shtetasit Shkëlzen Kastrati, ndodhur më 1 shkurt 2021 në Fier. Nga hetimet rezultoi se objektivi i atentatit ishte shtetasi Kelmend Kastrati, por për shkak të ngatërresës së objektivit, u vra gabimisht Shkëlzen Kastrati. Hetimet për pjesëtarët e tjerë të përfshirë në këtë ngjarje vijojnë.
