SPAK përfundoi hetimet dhe dërgoi për gjykim në GJKKO dosjen penale ndaj një avokati për ndikim të paligjshëm te funksionarët e sistemit të drejtësisë. E pandehur u mor dhe gruaja që kërkonte t’i shpëtonte akuzës.
Ndaj Bardhi Koçi, avokat, u ngrit akuza “Ushtrimi i ndikimit të paligjshëm ndaj personave që ushtrojnë funksione publike” (tre episode), ndërsa Pranvera Meshi u akuzua për veprën penale “Ushtrimi i ndikimit të paligjshëm ndaj personave që ushtrojnë funksione publike”.
Prokuroria e Posaçme, më datë 27.08.2021, mbi bazën e akteve të dërguara nga Policia Gjyqësore, ka regjistruar procedimin penal nr.229 për veprat penale “Ushtrim i ndikimit të paligjshëm ndaj personave që ushtrojnë funksione publike” dhe “Shpërdorim të detyrës”.
Në vijim të hetimeve për këtë procedim penal, përmes aplikimit të metodave speciale të hetimit, është dokumentuar kryerja e veprës penale “Ushtrim i ndikimit të paligjshëm ndaj personave që ushtrojnë funksione publike”, parashikuar nga neni 245/1 paragrafi 2 dhe 4 i Kodit Penal, e kryer nga shtetasit Pranvera Meshi dhe Bardhi Koçi.
Nga hetimet rezulton se Pranvera Meshi, në kohën e kryerjes së veprës penale, po gjykohej në Gjykatën e Shkallës së Parë të Juridiksionit të Përgjithshëm Tiranë, e akuzuar për veprën penale “Falsifikim i dokumenteve shëndetësore”.
Bardhi Koçi, me profesion avokat (i cili në kohën e kryerjes së veprave penale ishte i punësuar me detyrë Auditues në Kontrollin e Lartë të Shtetit), ka kërkuar nga shtetasja Pranvera Meshi shumën prej 1500 (njëmijë e pesëqind) euro dhe ka marrë prej saj, në formën e përfitimit të parregullt, shumën paraprake prej 1000 (njëmijë) euro, me qëllim ushtrimin e ndikimit në vendimmarrjen e gjyqtarit që po shqyrtonte çështjen në ngarkim të saj.
Shtetasi Bardhi Koçi ka kërkuar nga shtetasi A.M. shumën prej 1300 (njëmijë e treqind) euro me qëllim ushtrimin e ndikimit te dy funksionarë të sistemit të drejtësisë, për përshpejtimin e seancës gjyqësore për caktimin e masës së sigurimit personal ndaj shtetases N.M., e arrestuar për veprën penale “Drejtimi i automjeteve në mënyrë të parregullt”, e parashikuar nga neni 291 i Kodit Penal.
Gjithashtu, shtetasi Bardhi Koçi ka marrë përfitime të parregullta nga shtetasi R.G., me qëllim ushtrimin e ndikimit te ekspertët e Institutit të Policisë Shkencore. Ky ndikim kishte të bënte me nxjerrjen e aktit të ekspertimit kimik për një sasi lënde narkotike, e cila i ishte sekuestruar shtetasit B.G., i dyshuar për veprën penale “Drejtimi i automjeteve në mënyrë të parregullt”, e parashikuar nga neni 291 i Kodit Penal.
Prokuroria e Posaçme kundër Korrupsionit dhe Krimit të Organizuar ka dokumentuar dy episode të tjera të kryerjes së veprës penale “Ushtrimi i ndikimit të paligjshëm ndaj personave që ushtrojnë funksione publike”, parashikuar nga neni 245/1 paragrafi 4 i Kodit Penal, nga shtetasi Bardhi Koçi, dhe po vijon hetimet për dokumentimin e rrethanave dhe fakteve të tjera që kanë dalë nga hetimet e kryera lidhur me këtë procedim penal.
