Situata nga përmbytjet vijon të mbetet kritike në disa zona të vendit, si pasojë e reshjeve të dendura të shiut që nisën prej ditës së djeshme. Bilanci paraprak flet për qindra banesa të përmbytura, dhjetëra biznese të dëmtuara, evakuime familjesh, bllokim rrugësh dhe dëme të konsiderueshme materiale.
Zona më e goditur mbetet Gjirokastra, ku vërshimet e lumenjve dhe përrenjve kanë shkaktuar shkatërrime të mëdha, veçanërisht në lagjen “18 Shtatori”, ku dhjetëra biznese, banesa dhe automjete janë dëmtuar rëndë. Rrëshqitjet e dherave dhe prania e masiveve të inerteve kanë izoluar edhe disa fshatra, duke vështirësuar lëvizjen e banorëve.
Problematike paraqitet situata edhe në Durrës, ku mbi 800 banesa janë përmbytur dhe 304 persona janë evakuuar. Edhe pse reshjet kanë pushuar dhe gjendja është disi më e qetë, uji vijon të jetë prezent në disa zona periferike. Përmbytjet kanë prekur institucione publike, përfshirë burgun e qytetit, si dhe ambiente kulturore e artistike, duke rrezikuar vepra me vlerë të veçantë.
Rrezikshmëri e shtuar raportohet nga lumi Vjosa, niveli i të cilit ka arritur në 7.2 metra dhe i është afruar pikës kritike, duke dalë nga shtrati në disa segmente. Strukturat e emergjencave civile kanë rritur gatishmërinë dhe kanë njoftuar komunitetet përgjatë rrjedhës së lumit për masa paraprake sigurie.
Në veri dhe verilindje të vendit, situata mbetet e rëndë në zona të thella malore, ku rrëshqitjet e dherave kanë bllokuar plotësisht rrugët lidhëse dhe kanë izoluar disa fshatra. Ndërkohë, në disa akse kombëtare janë shënuar incidente nga rënia e gurëve, fatmirësisht vetëm me dëme materiale.
Reshjet kanë shkaktuar gjithashtu dëmtime në banesa dhe infrastrukturë rrugore në jug dhe juglindje të vendit, ndërsa rritja e nivelit të lumenjve ka sjellë përmbytje në zona të banuara dhe toka bujqësore. Në disa raste janë kryer evakuime preventive dhe autoritetet vijojnë monitorimin e vazhdueshëm të situatës.
