Ngjarja tragjike që ndodhi sot në ambientet e Gjykatës së Apelit, ku mbeti i vrarë gjyqtari Astrit Kalaja dhe mbetën të plagosur babë e bir, Rakip dhe Ervis Kurtaj, ishte paralajmëruar disa kohë më parë nga xhaxhai i autorit, Gjon Shkambi.
Një vit më parë, gjatë rubrikës “Shihem në gjyq”, në emisionin “E Diela Shqiptare” në TV Klan, xhaxhai i Elvis Shkambit kërcënonte drejtpërdrejt paditësin e tij, edhe pse i kishte borxh 15 mijë euro, që nuk i ishte kthyer.
I irrituar që çështja u trajtua në televizion, Gjon Shkambi paralajmëronte disa herë personin që kishte përballë, duke i thënë se nëse nuk lirohet prona që ai pretendonte se ishte e tij, do ta “minonte” në të katër qoshet e saj.
“Ja gjej unë formën si ta liroj. Do ta minoj në të katër qoshet, sepse është prona ime, e kam me çertifikatë. Të gjithë do t’i hedh në erë. Ju paralajmëroj, të gjithë do t’ju hedh në erë,” deklaronte Gjon Shkambi.
Megjithë paralajmërimet e përsëritura, që u bënë në një televizion kombëtar, institucionet përgjegjëse nuk i morën seriozisht, duke lënë hapësirë për ngjarjen tragjike që tronditi sot kryeqytetin.
Për ironi të fatit emisioni është transmetuar në 6 tetor të vitit të kaluar, si sot një vit më parë!
