Është shtyrë seanca paraprake në Gjykatën e Posaçme Kundër Korrupsionit dhe Krimit të Organizuar (GJKKO) për ish-presidentin Ilir Meta dhe ish-bashkëshorten e tij, Monika Kryemadhi, e parashikuar të zhvillohej ditën e sotme.
Shkak për shtyrjen e seancës ka qenë mungesa e një prej avokatëve mbrojtës të njërit prej të pandehurve, duke e bërë të pamundur zhvillimin normal të procedurës.
Më herët gjatë ditës, Monika Kryemadhi u pa teksa hynte në ambientet e GJKKO-së, duke buzëqeshur drejt mediave, por pa dhënë asnjë deklaratë. Ndërkohë, avokati i Ilir Metës, Kujtim Cakrani, u shpreh shkurt para nisjes së seancës: “Shihem pas seancës”.
Ilir Meta ndodhet në paraburgim prej më shumë se një viti, ndërsa ndaj tij dhe Kryemadhit po zhvillohet procedura paraprake, e cila do të përcaktojë nëse çështja do të kalojë për gjykim.
