Seanca paraprake ndaj ish-kryebashkiakut të Tiranës, Erion Veliaj, dhe të pandehurve të tjerë është shtyrë sërish. Shkak për këtë shtyrje u bë bojkoti i avokatëve penalistë, të cilët vijojnë të mos marrin pjesë në seancat gjyqësore në shenjë proteste për arrestimin e kolegut të tyre, avokatit Ulian Barjami.
Gjykata ka vendosur që seanca e radhës të mbahet më 28 tetor, në orën 10:00, megjithatë mbetet e paqartë nëse do të mund të zhvillohet, duke pasur parasysh që bojkoti i shpallur nga Dhoma Kombëtare e Avokatisë pritet të zgjasë deri më 25 tetor.
Sipas dosjes hetimore të SPAK, Erion Veliaj akuzohet për përfshirje në nëntë raste korrupsioni, pastrim parash dhe mosdeklarim pasurie, në bashkëpunim me bashkëshorten e tij, Ajola Xoxa, si dhe disa ish-zyrtarë të tjerë të Bashkisë së Tiranës.
Edhe seanca e mëparshme, e parashikuar për më 10 tetor, u shty për të njëjtën arsye – mungesën e avokatëve, të cilët ishin në bojkot pas vrasjes së gjyqtarit Astrit Kalaja. Në atë seancë mungoi edhe vetë Veliaj.
Bojkoti aktual i avokatëve penalistë përfshin të gjitha proceset gjyqësore, përfshirë ato në Gjykatën Kushtetuese, përveç rasteve që lidhen me masat e sigurisë. Ky pezullim i pjesëmarrjes së tyre ka bllokuar një sërë çështjesh të rëndësishme, përfshirë edhe procesin ndaj ish-kryebashkiakut të Tiranës.
