Më 5 maj 2026, U.S. Marshals Service (USMS) lokalizuan dhe arrestuan Sokol Hoxhën në bazë të shkeljeve të ligjit të imigracionit.
Sokol Hoxha, shtetas shqiptar, është subjekt i një njoftimi të kuq të INTERPOL-it (Red Notice) të lëshuar me kërkesë të Belgjikës, lidhur me një dënim për vrasje të vullnetshme (in absentia) për vrasjen e bashkëshortes së tij 19-vjeçare në gusht 1997 në Bruksel. Ai është gjithashtu subjekt i një njoftimi të INTERPOL-it të lëshuar nga Shqipëria për një dënim (in absentia) për vrasjen e dy vëllezërve në mars 1997 në Patos. Hoxha ka qenë në arrati që nga kryerja e këtyre krimeve.
Sipas hetimeve, ai dyshohet se vrau bashkëshorten e tij në Belgjikë pasi ajo kishte refuzuar kërkesat e tij për t’u përfshirë në prostitucion. Në të njëjtin vit, 1997, ai është dënuar në mungesë në Shqipëri me 25 vjet burg për vrasjen e dy vëllezërve në Patos.
Autoritetet bëjnë me dije se pas këtyre ngjarjeve, Hoxha është larguar nga Evropa dhe ka përdorur një identitet të rremë. Ai dyshohet se fillimisht ka udhëtuar drejt Mbretërisë së Bashkuar, ku ka pretenduar se ishte refugjat kosovar dhe ka kërkuar azil, duke siguruar më vonë edhe shtetësi britanike nën këtë identitet të rremë. Më pas, në vitin 2012, ai ka hyrë në Shtetet e Bashkuara duke vijuar të përdorë identitetin e rremë dhe ka arritur të marrë status të ligjshëm të rezidentit të përhershëm.
Hetimi gjashtëvjeçar i udhëhequr nga INTERPOL Washington, në bashkëpunim me agjenci vendase dhe ndërkombëtare, përfshirë INTERPOL Tirana, INTERPOL Bruksel, Policia Federale belge, Agjencia Kombëtare e Krimit në Mbretërinë e Bashkuar dhe autoritetet shqiptare, çoi në lokalizimin dhe arrestimin e tij në Ohio.
Autoritetet theksojnë se ky rast nënvizon rëndësinë e bashkëpunimit ndërkombëtar në ndjekjen e të kërkuarve dhe në parandalimin e përdorimit të identiteteve të rreme për të shmangur drejtësinë.
