Hetuesit italianë zbuluan një rrjet të strukturuar të trafikut të drogës që furnizohej nga Shqipëria dhe shpërndahej në Sardenjë dhe Toskanë. Sipas hetimeve, shqiptarët luanin një rol kyç si furnizues dhe ndërmjetës, duke lehtësuar transportin dhe pagesat e drogës.
Mbi 50 karabinierë morën pjesë në fazën e dytë të operacionit “Termine” në katër provincia të Italisë, ku u godit një grup të dyshuar për trafik droge mes Sardenjës dhe Toskanës, duke çuar në arrestimin e shtatë personave dhe vendosjen e masës së ndalimit të qëndrimit për disa të tjerë.
Hetimi filloi muaj më parë dhe më 6 tetor kishte çuar në 62 masa parandaluese. Sipas akuzës, dy organizata të ndërlidhura sillnin kokainë nga Ballkani dhe e shpërndanin në ishull përmes një rrjeti të strukturuar shpërndarësish, ndërmjetësish dhe kurierësh.
Hushi Klinton, shqiptar që jeton në Pisa, mori ndalimin e qëndrimit në Sardenia. Ai lehtësonte furnizimin dhe lëvizjen e drogës mes shqiptarëve dhe të dyshuarve italianë, duke marrë paratë e kokainës për furnizuesit shqiptarë. Hetuesit tregojnë se droga vinte nga Shqipëria, kalonte në Toskanë dhe më pas shpërndahej në Sardeni.
Në Iglesias u arrestuan Francesco Antonio Busonera, Paolo Loddo dhe Antonio Scano. Busonera konsiderohet i besuar nga drejtuesit e organizatës dhe kishte detyrë të kontaktonte blerësit lokalë. Loddo dhe Scano merreshin me shpërndarjen e drogës në zonë, duke menaxhuar kontaktet me blerësit dhe shpërndarjen në komunat përreth. Loddo kishte edhe rol në mbledhjen e parave nga blerësit.
Në Carbonia, Valeria Piras u arrestua për shpërndarje të kokainës dhe heroinës me pakicë. Ajo konsiderohet pjesë e rrjetit lokal të shpërndarjes dhe garantonte vazhdimësinë e qarkullimit të drogës në zonë.
Në Girasole, Federico Cualbu dhe Silvio Loi janë vendosur në arrest shtëpie. Cualbu lidhej me transportin e drogës ndërmjet furnizuesve dhe shpërndarësve, ndërsa Loi merrej me dorëzimin e substancave tek anëtarët e tjerë të grupit. Pietro Pinna, gjithashtu në arrest shtëpie, lidhet me sasi të mëdha droge.
