Prokuroria e Tiranës përfundoi hetimet dhe dorëzoi për gjykim dosjen penale ndaj tre punonjësve të Burgut 313 për akuzën e shpërdorimit të detyrës, lidhur me tentativën e arratisjes nga burgu e të paraburgosurve Arbër Çekaj, pronarit të kompanisë “Arbri Garden” i dënuar për trafikimin e 613 kg kokainë kolumbiane në Shqipëri, si dhe Fatmir Pjetrit, pjesëtar i bandës së Babagjyshëve. Në akuzë janë përfshirë punonjësit Redion Maloku, Bashkim Muça dhe Oldi Myzyri.
“Sipas referimit të bërë, në datë 08.08.2021, policia gjyqësore në SHKB ka marrë njoftim nga zyra e informacionit e IEVP “Jordan Misja“ Tiranë, se rreth orës 15:40 të asaj dite të paraburgosurit Arbër Çekaj dhe Fatmir Pjetri kanë tentuar të arratisen duke zbritur me një litar të improvizuar nga çarçafi, nga pjesa e ajrimit në tarracën e godinës “A” te shkallët e administratës, dhe më pas janë neutralizuar nga forcat e policisë në oborrin e IEVP-së. Në ushtrim të detyrës së tyre si punonjës të rolit bazë, të pandehurit Redion Maloku, Bashkim Muça dhe Oldi Myzyri kanë shkelur skemën e sigurisë së IEVP “Jordan Misja””, thuhet në dosje.
Sipas prokurorisë, këta tre shtetas mbajnë detyrën e punonjësve të rolit bazë në momentin e tentativës së arratisjes dhe nga hetimi rezulton se nuk kanë kryer kontrollin e detyrueshëm sipas ligjit dhe rregullores. Nëse punonjësit do të kishin kryer detyrën e tyre, të paraburgosurit nuk do të kishin mundur të lëviznin në ambientet e brendshme me sende të ndaluara ose të prodhuara prej tyre për arratisje apo për të ushtruar dhunë ndaj punonjësve të policisë që tentuan t’i ndalojnë. Kjo vërtetohet nga pamjet filmike të ambienteve të brendshme të IEVP 313.
Nga pamjet filmike rezulton se gardianët Redion Maloku, Bashkim Muça dhe Oldi Myzyri nuk kanë kryer kontroll fizik të Fatmir Pjetrit, i cili mbante një çantë me sende të ndaluara, duke bërë të mundur që të paraburgosurit të qarkullonin brenda IEVP-së me sende të ndaluara, të cilat më pas përdorën për tentativën e arratisjes.
