Shoqata Kombëtare e Gjyqtarëve të Republikës së Shqipërisë ka reaguar publikisht pas publikimeve të ditëve të fundit në media lidhur me kandidimin e Asim Vokshit për anëtar të Gjykatës Kushtetuese, duke i cilësuar ato si “sulme personale” që kanë kaluar kufijtë e kritikës së lejueshme dhe janë kthyer në “denigrime që prekin dinjitetin dhe reputacionin institucional të magjistratit”.
Në deklaratën e firmosur nga kryetari Engert Pëllumbi, Shoqata thekson se “liria e medias është thelbësore në një shoqëri demokratike”, por duhet ushtruar me “përgjegjësi, etikë dhe respekt ndaj së vërtetës”, në mënyrë që të mos kthehet në “mjet presioni apo instrument denigrimi ndaj gjyqtarëve”.
Duke iu referuar nenit 10 të Konventës Europiane për të Drejtat e Njeriut dhe neneve 22 e 23 të Kushtetutës, Shoqata kujton se e drejta për lirinë e shprehjes nuk mund të përdoret për të “nxitur përbuzje apo për të cenuar dinjitetin njerëzor dhe institucional të magjistratëve”, sidomos në procese kandidimi që kanë rëndësi për publikun dhe besimin në drejtësi.
Në vijim, Shoqata e Gjyqtarëve u bën thirrje mediave që të udhëhiqen nga “parimet e mirëbesimit dhe deontologjia profesionale”, ndërsa paralajmëron se fushatat e denigrimit “cenojnë besimin e publikut në sistemin e drejtësisë”.
“Respektimi i dinjitetit të magjistratëve është kusht themelor për ushtrimin e pavarur të pushtetit gjyqësor dhe për forcimin e besimit në drejtësi,” theksohet në reagim.
Shoqata saktëson se kjo deklaratë “nuk duhet interpretuar si përpjekje për t’u mbyllur ndaj medias”, por si apel për “dialog dhe bashkëpunim profesional”, në funksion të një komunikimi të ndershëm që pasqyron me saktësi rolin e gjyqësorit në mbrojtje të shtetit të së drejtës.
