Prokuroria e Tiranës ka përfunduar hetimet dhe ka çuar për gjykim 20 nëpunës publikë të Ministrisë së Bujqësisë dhe Zhvillimit Rural, të akuzuar për “shpërdorim detyre” të kryer në bashkëpunim, lidhur me shtatë procedura prokurimi me vlerë totale mbi 525 milionë lekë pa TVSH.
Hetimet nisën pas një kallëzimi nga Kontrolli i Lartë i Shtetit dhe zbuluan shkelje të shumta ligjore në tenderë për blerje pajisjesh veterinare, sisteme monitorimi për hidrovore, mbrojtje të bimëve dhe blerje kafshësh për dëmshpërblimin e fermerëve.
Sipas Prokurorisë, procedurat janë zhvilluar në kundërshtim me ligjin, kryesisht përmes negociimit pa shpallje paraprake, ndërsa janë evidentuar mangësi në përcaktimin e kritereve të mallrave dhe testime fiktive të tregut. Këto veprime kanë dëmtuar interesat shtetërore dhe kanë përbërë shkelje të detyrës zyrtare.
Të pandehurit do të përballen me akuzat në gjykatë për dëm ekonomik dhe shkelje të rënda të ligjit në proceset e prokurimit publik.
Njoftimi:
PROKURORIA PRANË GJYKATËS SË SHKALLËS I TË JURIDIKSIONIT TË PËRGJITHSHËM TIRANË
Shpërdoruan detyrën në të paktën shtatë prokurime në Ministrinë e Bujqësisë, Prokuroria Tiranës përfundon hetimet dhe dërgon në gjyq 20 nëpunës publikë
Prokuroria pranë Gjykatës së Shkallës së Parë të Juridiksionit të Përgjithshëm, Tiranë përfundoi hetimet dhe dërgon në gjyq 20 persona, nëpunës publikë, të gjithë të akuzuar për kryerjen e veprës penale ‘Shpërdorimi i detyrës’ e kryer në bashkëpunim parashikuar nga neni 248-25 i Kodit Penal.
Nga hetimet e kryera mbi procedimin penal nr.2069, të vitit 2025, rezultoi se shtetasit M.K., E.H., G.Xh., I.A. A.Gj., L.K. E.P., L.H., M.P., E.F., A.L., E.R., I.B., A.Z., A.Gj., S.P., A.I., A.Dh., K.N., A.A. kanë kryer veprëm e mësipërme në dëm të Ministrisë së Bujqësisë dhe Zhvillimit Rural.
Hetimet nisën pas kallëzimit të bërë nga Ministria e Bujqësisë dhe Zhvillimit Rural bazuar në raportet e auditit që Kontrolli i Lartë i Shtetit kreu, ku për shtatë procedura prokurimi, referohet se janë evidentuar shkelje të rënda ligjore në prokurime të zhvilluara kryesisht me negociim pa shpallje paraprake dhe fond limit 525,000,000 lekë pa TVSH.
Procedurat për të cilat u konstatuan shkelje kishin të bënin me prokurimet për “Shpenzime mbrojtje bimësh dhe luftimi i parazitëve në bujqësi”, për ‘Blerje pajisje për shërbimin veterinar (motoçikleta, kaska, veshje, doreza, çanta), “Blerje kafshë të llojit gjedh për dëmshpërblimin e fermerëve të dëmtuar nga dermatoza nodulare e gjedhit” si dhe për ‘Sistem i monitorimit me kamera për hidrovoret’.
Të pandehurit e mësipërm, në cilësinë e personave të ngarkuar me funksion publik, në bashkëpunim me njëri-tjetrin, për secilën procedurë tenderimi kanë vepruar në kundërshtim me ligjin ose ligjet që normojnë veprimtarinë përkatëse të personit që ushtron funksion publik konkret. Duke përbërë në këtë mënyrë mospërmbushje të rregullt të detyrës, duke dëmtuar interesat e ligjshme të shtetit, të shtetasve dhe të personave të tjerë juridikë.
Hetimi i procedurave provoi se janë konsumuar elementet e veprës penale dhe se kanë kryer veprime që nuk janë të justifikuara në lidhje me mangësitë për përcaktimin e kritereve të mallrave që kërkohen, por mbi të gjitha krijohet bindja se testimi i tregut është kryer në mënyrë fiktive.
Pas njohjes me tërësinë e akteve të sipërcituara, vlerësohet se ekziston bindja e bazuar në prova, se nga ana e anëtarëve të njësisë së prokurimit, është konsumuar vepra penale e shpërdorimit të detyrës, referuar llojit të procedurës së zgjedhur për prokurimet, krim i parashikuar përkatësisht nga neni 248-25 i Kodit Penal.
