Policia e Sarandës ka arrestuar dy vëllezër, të akuzuar për plagosjen e rëndë të një gruaje dhe djalit të saj, ngjarje e ndodhur pasditen e së dielës në lagjen nr. 4 të qytetit.
Sherri shpërtheu pas një konflikti për parkimin, ku Romeo Laze, 45 vjeç, dhe Fabion Laze, 39 vjeç, pronarë të një lavazhi, goditën me sende të forta dhe përmes grushteve nënë e bir, N.A. dhe E.A. Rreth orës 17:45, në konflikt u përfshinë të paktën 6 persona. Viktimat u transportuan me urgjencë në Spitalin e Sarandës, ku morën ndihmën e parë për plagët e shumta në kokë dhe trup, por jashtë rrezikut për jetën.
Policia shoqëroi fillimisht katër persona, ndërsa pas hetimeve arrestoi në flagrancë dy vëllezërit për veprën penale “plagosje e rëndë me dashje në bashkëpunim”.
Vëllezërit Laze rezultojnë me precedentë të shumtë penalë:
Në maj 2011, akuzohen për plagosje me sende të forta ndaj dy vëllezërve Avdiu.
Në tetor 2014, Fabion Laze u arrestua për “prodhim dhe shitje të lëndëve narkotike”.
Në dhjetor 2015, Romeo Laze u arrestua për “dhunë në familje” dhe dëmtime të tjera me dashje.
Në gusht 2021, Romeo Laze u arrestua përsëri për “prodhim dhe shitje të lëndëve narkotike”.
Në shkurt 2025, Prokuroria e Sarandës sekuestroi dy pasuri, dy automjete dhe një biznes të Romeo Lazes.
Fabion Laze ka precedentë penalë edhe jashtë vendit në fushën e narkotikëve.
Policia vijon hetimet për zbardhjen e plotë të ngjarjes dhe për identifikimin e personave të tjerë të përfshirë në konflikt.
