Një konflikt i dhunshëm në mes të ditës ka tronditur qytetin e Kukësit këtë të premte, duke përfunduar me përdorim të shkopit të bejsbollit dhe armës së zjarrit në ambientet e një lokali. Si pasojë e sherrit, një person ka mbetur i plagosur dhe ndodhet në spital, ndërsa pesë persona janë shpallur në kërkim nga policia.
Sipas policisë, dy prej të përfshirëve, shtetasit Ç. M. dhe E. M, kushërinj me njëri-tjetrin, bashkë me tre të tjerë janë konfliktuar me një person, të cilin e kanë goditur me shkop bejsbolli dhe kanë tentuar ta vrasin me armë zjarri. Ngjarja është shënuar në një lokal.
Shtetasi S. I. është dëmtuar si pasojë e goditjeve me shkop bejsbolli dhe ndodhet në spital, ndërsa nga të shënat nuk ka pësuar asnjë person lëndime.
Njoftimi i policisë:
Në një lokal në qytetin e Kukësit, shtetasit Ç. M. dhe E. M. (kushërinj me njëri-tjetrin), dyshohet se, së bashku me 3 shtetas të tjerë, gjatë një konflikti për motive të dobëta, kanë goditur me shkop bejsbolli dhe kanë tentuar të vrasin me armë zjarri shtetasin S. I.
Shtetasi S. I. është dëmtuar si pasojë e goditjeve me shkop bejsbolli dhe ndodhet në spital, nën kujdesin e mjekëve.
Nga të shtënat nuk ka persona të lënduar.
Është ngritur menjëherë grupi hetimor dhe, nën drejtimin e Prokurorisë Kukës, po vijon puna për zbardhjen dhe dokumentimin e plotë ligjor të këtij rasti, si dhe për kapjen e autorëve dhe të personave të tjerë të përfshirë në këtë konflikt.
