Një person është gjetur pa shenja jete në zonën e Plepave, në qytetin e Durrësit. Paraprakisht dyshohet se humbja e jetës ka ardhur si pasojë e mbytjes.
Viktima është identifikuar si A. H., 54 vjeç, punonjës i Ndërmarrjes Komunale Plazh. Sipas informacioneve paraprake, ai kishte shkuar në këtë zonë për të verifikuar situatën e krijuar nga reshjet e shumta të shiut dhe vërshimet e ujit, të cilat kishin shkaktuar problematika në sistemin kullues.
Dyshohet se gjatë kryerjes së këtyre verifikimeve, 54-vjeçari është marrë nga rrjedha e fortë e ujit, duke humbur jetën. Pas kërkimeve të zhvilluara nga shërbimet e Policisë dhe polumbarët e RENEA-s, trupi i pajetë u gjet në një kanal kullues, në afërsi të ish-repartit ushtarak.
Në vendngjarje kanë mbërritur forcat e Policisë, të cilat po kryejnë veprimet procedurale për dokumentimin e plotë të ngjarjes.
