Në Gjykatën e Posaçme u zhvillua seanca e radhës ndaj Arben Ahmetaj, i pandehur për dosjen BUKA. Ish-zv.kryeministri nga arratia përmes avokatëve kërkoi që seanca të trasmetohej live, sikurse më herët këtë kërkesë e paraqitën dhe ish-presidenti Ilir Meta dhe kryebashkiaku Erion Veliaj. Por edhe në rastin e tij, kërkesa u rrëzua. GJKKO vijoi më pas me dëgjimin e dëshmisë së biznesmenit Lirim Fejzollari.
Dëshmia e Fejzollarit
“Për privatizimin e “Buka sha” janë kryer të gjitha procedurat e nevojshme. Unë kam qenë aksioner dhe më parë, kur ishte edhe 52 % shtet edhe 48 % privat dhe u futa dhe në ankand.
Unë kam marrë aksione nga disa qytetarë dhe shoqëri dhe kam arritur deri tek 40% e pjesës private. Aksionet i kam blerë nga individë dhe kompani, që i kishin këto aksione”, tha dëshmitari.
Ai deklaroi më tej se Arben Ahmetaj e njihte si person publik, por në mënyrë zyrtare është takuar me të në 2018-2019 kur ishte ministër.
“Ne kishim probleme me industrinë, për çështjen e pullave fiskale”, tha ai.
Në lidhje me “Buka.sha” ai deklaroi se ishte takuar me familjen Myderizi (familja pronare).
“Nuk i njihja. Në takim më thanë disa pretendime, që as nuk i kuptova.
Ndërsa familjen Piciri i kam takuar disa herë. Kam biseduar shumë qetë me ta. Unë nuk i kuptoj këto kthimet e pronave. Ju kam thënë, keni gjykatat, kërkojini tek institucionet shtetërore”, shtoi më tej dëshmitari.
Prokurori Gokaj: si e shpjegoni një sms në telefonin tuaj: “më telefono pak. Arben Ahmetaj jam”?
Fejzollari: Duhet të ketë qenë në fazën e pullave fiskale, diskutimet që bënim.
Prokurori Gokaj: Në 23.02.2020 i thoni Ahmetajt me sms “Përshëndetje Arben! Si i ke mundësitë për t’u takuar këtë javë”.
Fejzollari: Siç e thashë, kishim problemet me pullat. Por ky takim nuk u realizua.
