Një denoncim i mbërritur në redaksinë e VNA tregon gjendjen e rrugës së re Palasë–Dhërmi, e cila është mbuluar nga balta dhe inerte ndërtimi. Edhe në këtë rast, nuk është natyra ajo që ka sjellë këtë situatë, por kamionët e kompanive të ndërtimit që po punojnë në resortet e biznesmenëve në zonë.
Gjendja e rrugës tregon qartë se subjektet nuk po zbatojnë rregulloren që parashikon se, pas çdo daljeje nga kantieri, kamionët duhet të pastrojnë gomat përpara se të hyjnë në rrugë urbane.
Në gjumë duket se janë edhe autoritetet përgjegjëse, si Bashkia Vlorë, IMT Vlorë, Policia e Shtetit dhe Inspektorati Shtetëror i Mjedisit, të cilëve do t’u mjaftonte një kalim i vetëm në këtë segment për të kuptuar se rregullat ligjore nuk po zbatohen.
Mbulimi i rrugës nga balta dhe inertet e ndërtimit mund të sjellë disa pasoja, që nga rreziku i rrëshqitjes së automjeteve, bllokimi i kanalizimeve, dëmtimi i rrugës, deri te ndotja e mjedisit.
Këtë problem duket se nuk e vë re as ARRSH, e cila duhet të njoftojë autoritetet përkatëse, pasi me këtë mbron një investim prej 1.5 miliardë lekësh, i përfunduar vetëm dy vite më parë, duke shmangur kështu justifikimet e zakonshme në rast dëmtimi se “fajin e ka moti”.
