Pas një nate të trazuar, uji i lumit Seman ka përfshirë sërish tokat bujqësore në fshatin Goriçan të Dimalit. Edhe pse reshjet kanë pushuar, niveli i ujit vazhdon të rritet.
Fermerët thonë se kanë hapur kanalet dhe kanë krijuar vija për të lehtësuar largimin e ujit, por përpjekjet e tyre nuk kanë sjellë rezultat. Ata dyshojnë se përmbytja nuk ka ardhur thjesht nga shirat, por edhe nga faktorë të tjerë.
Serrat e mbjella me domate dhe trangull qëndrojnë prej pesë ditësh nën ujë. Fermerët paralajmërojnë se prodhimi është prishur dhe rrezikon të kalbet për shkak të qëndrimit të gjatë në ujë. Dëmi i shkaktuar llogaritet në miliona lekë, dhe banorët kërkojnë ndihmën e shtetit për t’u rikthyer në aktivitet.
Edhe blegtoret po përballen me pasojat e përmbytjes. Bagëtitë, të cilat ishin larguar nga stanet një javë më parë, po kthehen sot, pasi niveli i ujit ka rënë dhe stanet janë më të sigurta.
Sipas banorëve, deri tani rreth 40 hektarë serrash dhe 120 hektarë toka bujqësore janë prekur nga përmbytja, ndërsa përllogaritja e dëmeve zyrtare ende nuk është bërë.
