Reshjet e dendura të shiut që godasin vendin prej ditës së hënë kanë shkaktuar probleme të konsiderueshme për banorët e disa fshatrave të Pogradecit. Në fshatin Rëmenj, një banesë është shembur nga prurjet e ujit, ndërsa pronari, i cili ndodhet në trajtim me kimioterapi në Tiranë, bën apel për ndihmë.
“Bëj kimio, ku të vete unë, jam vetë i gjashti. Ku të fle sot unë? Fëmijët i kam çuar te komshia”, tha ai.
Situata mbetet e rënduar edhe në fshatin Progër të Devollit, ku një 75-vjeçare, e cila dyshohet të ketë probleme të shëndetit mendor, rezulton e zhdukur që prej mëngjesit të së premtes. Familjarët njoftuan policinë, ndërsa dyshohet se e moshuara mund të jetë marrë nga rrjedha e fuqishme e ujit.
Sipas të dhënave më të fundit, reshjet kanë shkaktuar prurje të ujit nga lumi i Vërdovës, Rëmenjit dhe Qytetit. Në fshatrat Rëmenj e Gështenjas është raportuar prezencë e ujit në banesa, ndërsa në Dardhas, Proptisht e Çërravë janë shënuar rrëshqitje dherash.
