Reshjet e dendura të shiut kanë përfshirë vendin që nga mesnata, duke shkaktuar përmbytje në rrugë, oborre dhe tokë bujqësore në disa qarqe.
Qyteti i Durrësit është ndër më të prekurit, ku rrugët janë të përmbytura dhe qarkullimi është i pamundur në disa segmente, përfshirë aksin Tiranë–Durrës pranë karburantit në hyrje të qytetit. Situata më kritike paraqitet në zonat Spitallë, Nishtulla dhe ish-Kënetë (Durrësi i Ri), ku shumë rrugë mbeten pothuajse të pakalueshme.
Tetë familje janë evakuuar në Kovaleshencë për shkak se banesat e tyre janë përmbytur nga uji. Mësimi është pezulluar në shumicën e shkollave, ndërsa prindërit dhe mësuesit janë udhëzuar të shmangin lëvizjet deri në qetësimin e situatës.
Prezencë uji ka edhe në paraburgimin e Durrësit, ku ndodhen të izoluar kryebashkiaku, Erion Veliaj, dhe ish-ministri i Shëndetësisë, Ilir Beqaj, etj. I gjithë kati i parë është përmbytur, ndërsa të dënuarit dhe paraburgosurit janë vendosur në katin e dytë të burgut.
Në Lezhë, reshjet kanë shkaktuar përmbytje të tokave bujqësore dhe probleme në shkolla. Një familje në Milot ka raportuar prani uji në banesë. Në Bashkinë Lezhë, situata është më problematike pasi lumi Drin ka arritur kuota kritike mbi +2.2 metra, ndërsa oborret e shkollave “Kosova” dhe “Gjergj Fishta” janë përmbytur, duke pezulluar mësimin.
Sipërfaqe të mëdha tokash bujqësore janë prekur, ndërsa një familje në Torovicë ka kërkuar ndihmë emergjente për shkak të ujit që ka hyrë deri në 50 cm brenda banesës. OSHEE raporton probleme me fiderin që furnizon disa fshatra.
Edhe në Mirditë reshjet kanë qenë intensive, por deri tani nuk raportohet për probleme serioze. Nivelet e lumit Drin dhe lumit Mat janë rritur, ndërsa disa zona periferike kanë pësuar ndërprerje të energjisë elektrike.
Në qytetin e Kukësit, përmbytjet kanë prekur disa segmente rrugore, duke vështirësuar lëvizjen e automjeteve dhe këmbësorëve, sidomos në rrugën e “Prizrenit” dhe lagjen e re të qytetit. Shumë rrugë rurale janë dëmtuar nga dalja e përrenjve nga shtrati, duke izoluar zona të ndryshme.
Aksi rrugor Elbasan–Gjinar po përballet me vështirësi serioze në qarkullim për shkak të ujit dhe dherave të depozituara përgjatë rrugës. Situata ndikon në fshatrat e njësisë bashkiake Gjinar dhe qytetarët udhëzohen të lëvizin me kujdes të shtuar, veçanërisht gjatë natës dhe në kohë reshjesh. Autoritetet lokale planifikojnë ndërhyrje për pastrimin e rrugëve dhe normalizimin e qarkullimit.
Autoritetet vendore dhe emergjencat civile janë në terren duke monitoruar situatën dhe duke ndërhyrë ku është e nevojshme, ndërsa qytetarëve u bëhet thirrje të shmangin lëvizjet e panevojshme dhe të tregojnë kujdes maksimal.
