Kreu i Prokurorisë së Posaçme Kundër Korrupsionit dhe Krimit të Organizuar (SPAK), Altin Dumani, prezantoi sot raportin vjetor para Komisionit të Ligjeve, duke bërë një pasqyrë të detajuar të punës së institucionit për vitin 2024. Në fjalën e tij, Dumani theksoi sfidat kryesore që SPAK përballet, duke kërkuar ndërhyrje ligjore dhe mbështetje institucionale për të garantuar pavarësinë dhe efikasitetin e mëtejshëm.
Ai shprehu shqetësim për presionet e jashtme nga faktorë politikë, media dhe krimi i organizuar, të cilat sipas tij rrezikojnë integritetin e institucionit dhe punën e prokurorëve. Dumani kërkoi një reagim të koordinuar për mbrojtjen e SPAK-ut dhe pavarësinë e tij në kryerjen e hetimeve.
Ndër problemet e ngritura ishte mungesa e një përcaktimi të qartë ligjor për statusin e prokurorëve pas përfundimit të mandatit, si dhe mungesa e këshilltarëve ligjorë, që ndikojnë negativisht në cilësinë e hetimeve dhe përfaqësimin në gjykata. Numri i ulët i referimeve nga institucionet publike për çështjet e korrupsionit dhe krimit u cilësua gjithashtu si shqetësim.
Dumani përmendi vonesat në finalizimin e sistemit elektronik të administrimit të çështjeve, që pritet të përfundojë në 2025, si dhe nevojën urgjente për ngritjen e një njësie analize për mbështetjen e hetimeve komplekse dhe raportimet ndërkombëtare.
Një tjetër problem i theksuar ishte mungesa e kuadrit ligjor për menaxhimin e pasurive të sekuestruara në formën e kriptomonedhave, duke u theksuar se aktualisht nuk ka kapacitete për ruajtjen e tyre të sigurt.
Në fushën e bashkëpunimit ndërkombëtar, Dumani kërkoi ndryshime ligjore për të lehtësuar njohjen dhe zbatimin e vendimeve penale të huaja, kompetenca që aktualisht i përkasin Prokurorisë së Përgjithshme. Si zhvillim pozitiv, ai vuri në dukje përmirësimin e bashkëpunimit me Emiratet e Bashkuara Arabe, ku në 2025 janë ekstraduar 8 shtetas shqiptarë, një hap i rëndësishëm krahasuar me situatën problematike të vitit 2024.
Dumani kërkoi gjithashtu rishikimin e statusit të ndërlidhësve të sektorit të bashkëpunimit ndërkombëtar, të cilët aktualisht trajtohen si nëpunës civilë, pavarësisht detyrave procedurale që kryejnë, për të përmirësuar efikasitetin në këtë fushë.
