Mjaftuan vetëm disa reshje shiu që aksi Qukës–Qafë Plloçë të dëmtohej në disa segmente të tij. Rruga 43 kilometra e gjatë, e inauguruar nga kryeministri dy muaj më parë dhe e ndërtuar me një kosto prej 260 milionë eurosh, duket se ende nuk garanton siguri të plotë, pavarësisht se punimet për të zgjatën 16 vite.
Në kilometrin e 35-të, skarpatet janë çarë dhe një masiv gurësh ka rënë në rrugë, fatmirësisht pa zënë poshtë mjete që qarkullonin. Aktualisht aksi është i bllokuar, ndërsa kompania ndërtuese ka hapur një segment provizor deri në pastrimin dhe riparimin e zonës së dëmtuar.
Ngjarja ngre pikëpyetje serioze mbi cilësinë e punimeve dhe menaxhimin e investimeve në infrastrukturën kombëtare. Rrugët e reja, të cilat duhej të përmirësonin qarkullimin dhe sigurinë e qytetarëve, duket se nuk arrijnë të përballojnë as kushtet bazike të motit.
