Qerreti, një nga zonat bregdetare më të njohura të Kavajës, po shndërrohet me shpejtësi në një hapësirë të mbuluar nga betoni. Skavatorët dhe vinçat janë kthyer në pamje të zakonshme, ndërsa ndërtimet e pallateve vijojnë pa ndërprerje gjatë gjithë vitit.
Nëse hedh një sy në hartën e Google Maps, zona paraqitet si një fushë e gjelbër me pak resorte të shpërndara. Por realiteti në terren është krejt ndryshe. Një video me dron të siguruara nga VNA tregojnë një panoramë të mbushur me pallate që kanë “lulëzuar” njëri pas tjetrit, dhe me shumë ndërtime të tjera që janë në proces. Thënë më thjesht, pamja duket sikur konkurron me atë të Tiranës.
Banorët e zonës kanë ngritur shqetësime serioze, duke theksuar se në kulmin e sezonit turistik, Qerreti është kthyer në një kantier të vërtetë ndërtimi, pa asnjë kontroll institucional.
Sipas tyre, punimet zhvillohen në çdo orë të ditës, madje që në orët e para të mëngjesit duke shkelur çdo normë ligjore dhe duke prishur qetësinë e pushuesve dhe banorëve vendas.
