Është publikuar fotoja e Edoardo Sarchi, italianit që u qëllua për vdekje në fshatin Salari të Tepelenës, pronar i kompanisë “TEGOLA EDILCENTRO”.
Sipas Open Data, kompania në fjalë ka të shtrirë aktivitetin në prodhim dhe tregtim me shumicë dhe pakicë të tullave dhe tjegullave dhe produkteve te tjera.
Nuk përjashtohet mundësia që ekzekutimi i tij të ketë lidhje me konkurrencën.
44-vjeçari jetonte prej dy dekadash në Tiranë ndërsa ndodhej në zonë e Salarisë për gjah, bashkë me disa persona të tjerë.
Burime bëjnë me dije se autori i dyshuar ka dalë në mes të rrugës në një zonë të pyllëzuar dhe ka qëlluar në drejtim të mjetit ku ndodhej viktima, duke krijuar dyshime se bëhet fjalë për një pritë të organizuar.
Pas të shtënave, shoferi i automjetit ka vijuar rrugën me shpejtësi për të shpëtuar nga sulmi. Ngjarja ndodhi në vendin e quajtur “Dilan”, rreth orës 00:30.
Policia ka shoqëruar disa persona për t’i marrë në pyetje, ndërkohë që një shtetas me inicialet G. B. është shpallur në kërkim si i dyshuar kryesor për ekzekutimin. Hetimet janë përqendruar në pistën e një konflikti të mundshëm personal apo ekonomik.
