Qytetarë, prindër, studentë dhe kryefamiljarë protestuan kundër urdhrit të ministres Albana Koçiu, i cili prej katër muajsh bllokon lëvizjen e mjeteve elektrike në vend. Sipas tyre, monopatinat dhe skuterët janë për shumë prej tyre mjeti i vetëm i transportit në një kryeqytet pa tramvaj dhe metro, ndërsa çmimi i karburantit mbetet i lartë.
Protestuesit kundërshtuan argumentet e ministres për mungesë infrastrukture, duke theksuar se në Tiranë janë ndërtuar 52 kilometra korsi biçikletash. Ata hodhën poshtë edhe pretendimet për rrezikshmëri më të lartë të monopatinave, duke deklaruar se aksidentet me makina janë më të shpeshta dhe me pasoja më të rënda.
Gjithashtu, u kundërshtua praktika e sekuestrimit të mjeteve për mungesë fature, me argumentin se ligji parashikon ruajtjen e saj vetëm për një ditë dhe në një distancë të caktuar nga vendi i blerjes.
Protestuesit paraqitën dy kërkesa kryesore: anulimin e menjëhershëm të urdhrit dhe kthimin e mjeteve të sekuestruara, së bashku me dëmshpërblimin e qytetarëve.
