25 sanitare të Spitalit Psikiatrik “Ali Mihali” në Vlorë kanë dalë në protestë këtë të hënë, duke denoncuar mungesën e pagesës së rrogës për të dytin muaj radhazi, mungesën e kontratave të punës, pagat minimale, deklarimet e pasakta në bankë si dhe kushtet e vështira në të cilat punojnë.
Sanitaret thonë se kanë kërkuar takime me drejtuesen e Spitalit dhe me përfaqësues të firmës private që menaxhon shërbimin e pastrimit, por prej pothuajse dy muajsh nuk kanë marrë asnjë përgjigje.
Sipas tyre, refuzimi për t’u pajisur me kontrata pune dhe kërcënimet për largim nga puna nga administrata e spitalit janë shqetësime të vazhdueshme që rrezikojnë jo vetëm vendet e tyre të punës, por edhe sigurinë e tyre ekonomike. “Jemi kryefamiljare, mbajmë familjet tona, kemi mbi 40 vite punë në këtë institucion dhe trajtohemi në mënyrë të papranueshme,” shprehen disa prej tyre.
Inspektorati Shtetëror i Punës ka deklaruar se do të nisë verifikimet pranë institucionit për të shqyrtuar situatën. Ndërkohë, drejtoria e spitalit nuk ka dhënë asnjë koment, duke ia kaluar përgjegjësinë firmës private të kontraktuar për shërbimin sanitar.
Sanitaret paralajmërojnë se nëse nuk gjendet një zgjidhje e menjëhershme për situatën, do të ndërpresin punën në shenjë proteste.
