Ministrja e Brendshme, Albana Koçiu, reagoi sërish në rrjetet sociale lidhur me protestën e organizuar nga opozita, duke e cilësuar atë si “të njëjtën shfaqje të shëmtuar” dhe “skenografi të vjetër me tym e me flakë”.
Në reagimin e saj, Koçiu u shpreh se protesta përfaqëson një “revolucion me pagesë”, ku, sipas saj, dhuna ka zëvendësuar debatin politik. Ajo theksoi se një kauzë e drejtë nuk ka nevojë për maska apo mjete të dhunshme, ndërsa shtoi se mbështetja qytetare fitohet përmes votës dhe jo përmes akteve të paligjshme.
Ajo akuzoi organizatorët e protestës se po i thërrasin qytetarët të përfshihen në akte që dëmtojnë rendin dhe sigurinë, pavarësisht se, siç u shpreh, shqiptarët kanë dhënë verdiktin e tyre përmes votës ndër vite.
Koçiu hodhi poshtë pretendimin se protesta ishte qytetare, duke e cilësuar djegien e institucioneve si vandalizëm dhe sulmet ndaj Policisë së Shtetit si vepra penale. Sipas saj, protesta nuk është kundër qeverisë, por kundër stabilitetit, sigurisë dhe imazhit ndërkombëtar të vendit.
