Rreth 1,500 efektivë të Policisë së Shtetit do të jenë në terren në gatishmëri për të garantuar rendin dhe sigurinë gjatë protestës së opozitës para Kryeministrisë.
Ndërkohë, drejtori i Përgjithshëm i Policisë së Shtetit, Skënder Hita, ka zbritur në terren për të monitoruar nga afër situatën në prag të protestës.
Policia e Shtetit u ka bërë thirrje organizatorëve të protestës që të distancohen nga çdo akt që cenon rendin dhe sigurinë publike.
Nga pamjet e siguruara, shihet se përveç bllokimit të qarkullimit në Bulevardin “Dëshmorët e Kombit”, janë vendosur edhe gardhe metalike dhe është ngritur podiumi.
Prej orës 15:00 të ditës së sotme, rrugët përreth Kryeministrisë do të jenë të bllokuara për shkak të tubimit.
Akset ku ndalohet qarkullimi i automjeteve janë:
Bulevardi “Dëshmorët e Kombit”
Rruga “Ukraina e Lirë”
Rruga “Papa Gjon Pali II”
Rruga “Ismail Qemali”
Gjithashtu është ndaluar lëvizja dhe parkimi i automjeteve në Bulevardin “Dëshmorët e Kombit”, nga “Ura e Dajtit” deri në rrugën “Ismail Qemali”.
