Prokuroria e Përgjithshme ka reaguar pas raportimeve nga grupi i hakerave iranianë “Homeland Justice”, të cilët deklaruan se kishin arritur të merrnin akses në dosjet e institucionit.
Sipas komunikatës zyrtare, verifikimet e kryera nga ekspertët e sigurisë së IT-së nuk kanë konstatuar asnjë gjurmë kompromentimi deri në këtë moment. “Stafet tona të IT-së janë duke monitoruar në mënyrë të vazhdueshme situatën”, njofton Prokuroria, duke theksuar se faqja dhe të dhënat e institucionit mbeten të sigurta.
Grupi “Homeland Justice” është i njohur për sulme kibernetike në rajon, por deri tani pretendimet e tyre për Prokurorinë e Përgjithshme nuk kanë marrë konfirmim nga autoritetet.
Reagimi i Prokurorisë së Përgjithshme:
Për shkak të interesit në lidhje me hackerimin e mundshëm të faqes zyrtare së Prokurorise së Pergjithshme, ju bëj me dije se nga verifikimet e kryera nga eskpertet e sigurisë së IT-së nuk janë konstatuar gjurmë kompromentuese deri në momentin që flasim në formën hackerimit. Stafet tona të IT-së janë duke monitoruar në mënyrë të vazhdueshme situatën.
