Amar Shkëmbi alias Dritan Shkëmbi pritet të ekstradohet nga Dubai drejt Shqipërisë.
Shkëmbi ishte shpallur në kërkim nga SPAK për “Vrasje të funksionarëve publikë” të mbetur në tentativë, “Vrasjes në rrethana të tjera cilësuese” me pasojë vdekjen.
Ai akuzohet për atentatin te mbikalimi i Shkozetit më 1 nëntor 2018 me 1 të vrarë dhe dy të plagosur. Në atentat u plagosën prokurori i Durrësit Arjan Ndoj, sot deputet i PD-së në Kuvend, dhe Aleksandër Laho i njohur si Rrumi. Ndërsa mbeti i vrarë shoferi Andi Maloku.
Policia e Shtetit
Në vijim të bashkëpunimit të ngushtë me partnerët ndërkombëtarë, me qëllim lokalizimin, arrestimin dhe ekstradimin e shtetasve të shpallur në kërkim ndërkombëtar, ditën e sotme, pritet të ekstradohet nga Dubai, Emiratet e Bashkuara Arabe, në Shqipëri, shtetasi A. Sh. alias D. Sh. Gjykata e Posaçme e Shkallës së Parë për Korrupsionin dhe Krimin e Organizuar, në vitin 2022, i ka caktuar masën e sigurisë “Arrest në burg”, për veprat penale “Vrasja e funksionarëve publikë”, mbetur në tentativë, “Vrasja në rrethana të tjera cilësuese”, “Mbajtja pa leje dhe prodhimi i armëve, armëve shpërthyese dhe i municionit”, “Sigurimi i kushteve dhe i mjeteve materiale për të kryer vrasje” dhe “Vjedhja”, kryer në kuadër të grupit të strukturuar kriminal.
