Policia e Shkodrës dështoi në mënyrë spektakolare për të arrestuar Barush Bregun, një i shumëkërkuar i drejtësisë i konsideruar si krahu i djathtë i Ibrahim Licit. Dje, forcat e policisë organizuan një aksion për kapjen e Bregut, i cili kërkohet si bashkëpunëtor i Ragip Gilës në masakrën e Shkodrës, me dy të vrarë dhe dy të plagosur.
Sipas burimeve, ai po udhëtonte në makinë me Ervis Babën dhe një 17-vjeçar në lagjen “Gurrile” të Shkodrës. Forcat e policisë mësohet se iu bënë shenjë për të ndaluar, por ata nuk iu bindën urdhrit dhe drejtuesi i mjetit bëri manovra të rrezikshme duke shtuar shpejtësinë.
Barush Bregu doli nga makina dhe teksa largohej qëlloi në ajër. Dy personat e tjerë u vunë në pranga.
Arma që u përdor nga Bregu u gjet brenda automjetit tip “Volkswagen Seat” me të cilin 3 personat po lëviznin.
Barush alias Bajram Bregu, është shpallur në kërkim për masakrën ku mbetën të vrarë Liridon Kraja dhe Armando Pali, ndërsa u plagosën Erogen Vaso Bajroviç, që dyshohet të jetë dhe shënjestra e atentatit dhe një kamariere e lokalit.
Ndaj tij rëndojnë akuzat “Sigurimi i kushteve dhe mjeteve materiale për të kryer vrasje”, ”Mbajtja pa leje dhe prodhimi i armëve, armëve shpërthyese dhe municionit” dhe “Vjedhje”.
Barush Bregu njihet si njeriu i besuar i të shumëkërkuarit Ibrahim Lici. Ky i fundit është kundërshtar i përbetuar i grupit kriminal Bajri. Nga përplasja mes tyre janë shkaktuar dhjetra viktima.
