Policia e Shkodrës ka arrestuar një tjetër banor i Baks-Rrjollit që u përlesh me punonjësit e sigurisë private tek resorti në ndërtim i Bashkim Ulajt.
Përplasja nisi pasi punonjësit e sigurisë private donin të pengonin banorët që donin të protestonin në vendin ku po bëhen punimet, dhe ata pretendojnë se po u grabiten pronat. Nga përleshjet pati edhe një punonjës “Security” të dëmtuar, teksa dje u njoftuan 4 arrestime, 6 marrje nën procedim dhe 15 të kërkuar.
Sot u njoftua për arrestimin e një tjetër personi, 51-vjeçar, të akuzuar për shkatërrim të pronës dhe plagosje të rëndë me dashje.
Sipas autoriteteve “shtetasi N. M. së bashku me persona të tjerë ka organizuar protestën në fshatin Rrjoll, ku banorët e zonës shprehen se po u merren banesat për të ndërtuar një resort turistik”.
Sipas njoftimit të policisë 51-vjeçari së bashku me të tjerë ka goditur punonjësit e kompanisë private të sigurisë dhe kanë shkatërruar makineri të firmës që kryen punimet.
