Një përplasje është regjistruar në Golem të Kavajës mes Policisë dhe një grupi personash, ku njëri prej tyre rezultonte në masën e sigurisë “arrest në shtëpi”.
Në një njoftim zyrtar, Policia bën me dije se rreth orës 19:10, Patrulla e Përgjithshme e Postës së Policisë Golem, së bashku me ndihmësspecialistin e zonës në gatishmëri, gjatë patrullimit kanë konstatuar në rrugë shtetasin A. B., 38 vjeç, i shoqëruar nga persona të tjerë. Ai u ndalua për verifikim pasi njihej nga Policia se ishte me masë sigurie “arrest në shtëpi” për veprën penale “Shkatërrimi i pronës me zjarr”.
Sipas uniformave blu, gjatë verifikimit shtetasit iu kërkua shpjegim për thyerjen e masës së sigurisë dhe iu komunikua se do të shoqërohej në Komisariatin e Policisë Kavajë për veprime të mëtejshme. Në këto rrethana, A. B. dhe kunati i tij, shtetasi A. Sh., 23 vjeç, kanë kundërshtuar me forcë punonjësit e Policisë, të ndihmuar edhe nga familjarë të tjerë të pranishëm.
Për të zbrapsur personat e përfshirë, ndihmësspecialisti i Postës së Policisë Golem ka qëlluar një herë në ajër me armën e shërbimit. Më pas, në mbështetje kanë mbërritur shërbime të tjera policore, të cilat kanë bërë shoqërimin në komisariat të personave të përfshirë në kundërshtimin e Policisë.
Gjithashtu, në Komisariat është shoqëruar edhe shtetasi A. B., për thyerje të masës së sigurisë.
Veprimet hetimore për rastin po kryhen nga Oficeri i Policisë Gjyqësore i Prokurorisë së Juridiksionit të Përgjithshëm Durrës, ndërsa për ngjarjen është njoftuar edhe Agjencia e Mbikëqyrjes Policore.
