Në seancën e radhës në GJKKO për dosjen “Plumbi i Artë”, i penduari i drejtësisë, Erjon Alibej, ka pranuar përfshirjen e tij në disa vrasje të bujshme. Ai deklaroi se ka qenë financues i vrasjes së Dorjan Shkozës dhe pjesëmarrës në ekzekutimin e Besian dhe Viktor Haxhisë, Emiljano Ramazanit, Regis Runajt dhe Bujar Çelës.
Alibej tregoi se motivi për vrasjen e Shkozës lidhej me hakmarrjen ndaj autorëve të vrasjes së familjarëve të tij, informacion që, sipas tij, ia kishte dhënë Nuredin Dumani. Ai pranoi gjithashtu përdorimin e aplikacionit të koduar "EncroChat" për komunikime të grupit.
“Jam financues në vrasjen e Dorjan Shkozës. Jam pjesëmarrës në vrasjen e Besian dhe Viktor Haxhia. Jam pjesëmarrës në vrasjen e Emiljano Ramazanit dhe Regis Runajt. Dhe në vrasjen e Bujar Çelës. Kam qenë i dënuar më parë për trafik droge, në 2010-2011. Për këtë çështje jam arrestuar dhe kam dal nga burgu në 2013. Kemi qenë një grup i dënuar për këtë çështje, mes tyre dhe vëllai im i ndjerë. Vrasjen e Dorjan Shkozës e kërkova sepse me çdo kusht doja Talo Çelën.
Nga komunikimi që unë kisha me Nuredinin, unë disa persona nuk i njihja që ishin pjesëtarë në vrasjen e familjarëve të mi. E mësova nga Nuredin Dumani që Dorjan Shkoza ka marrë pjesë në ekzekutimin e familjarëve të mi. Nuredin Dumani me dukej i besuar sepse më korrespondonin të dhënat. Nuredini Dumani nuk më tregoi ndonjë dokument për Dorjan Shkozën, por thëniet e tij më bindën. Lidheshin rrethanat, sepse Nuredini më tha kane qenë dy makina.
Ndaj familjarëve të mi është qëlluar me dy automjete. Për vrasjen e Anxhelo Avdia e mora vesh përmes televizorit mos gaboj. Nuk kisha dëgjuar më parë për Anxhelo Avdinë. Nuredini më tha që ai ishte pjesë e grupit kundërshtuar, i Talo Çelës. Enchro Chatin e kam përdorur që kur është hedhur në treg. Rreth vitit 2016-2017 e kam nisur përdorimin”, tha Alibej.
